Asgjë e re nga vizita e kreut të PD, Sali Berisha, në Asamblenë Parlamentare të Komisionit Evropian në Strasburg, i cili në konferencën e sotme për mediat tha se kishte denoncuar aferat e qeverisë, duke i përsëritur edhe në daljen e sotme për mediat.
Berisha tha se ndërkombëtarët u njohën me regjimin autoritar të Ramës, si i vetmi i bazuar në kartelet e drogës, kurse fantazma e kryeministrit për disa ditë u soll në korridoret e Asamblesë së KE-së, ku u denoncuan edhe aferat që, sipas tij, kreu i qeverisë po i mbron tani politikisht.
“Kërcënimin e madh që përbën Rama për vendet e Evropës është duke i bërë të mundur koordinatorit të tij që t’i transmetojë të gjitha të dhënat dhe sekretet e sigurisë armiqve të vendit tonë dhe të vendeve të NATO-s. Mund t’ju them se tre ditë në sallat e tempullit të demokracisë, fantazma e kreut të organizatës kriminale Edi Rama ishte më e përçmuara! Qytetarët do flasin dhe shqiptarët do njohin edhe protestën më të fuqishme që kanë njohur ndonjëherë,” tha ai.
Por kreu i PD është i vetëdijshëm se qeveria rrezohet vetëm me reagim qytetar, dhe për këtë paralajmëroi se opozita po përgatit një protestë të dytë, që sipas tij nuk është parë asnjëherë më parë, pa specifikuar se kur mund të mbahet.
Berisha e cilësoi protestën e 24 janarit si të fuqishme, megjithëse në të vërtetë ishte një “déjà vu” i tubimeve të vitit 2019, ku qytetarët mblidhen, përplasen me policinë dhe në fund gjithçka kthehet në normalitet me Ramën në qeveri.
