Në një periudhë kur qytetarët presin vendimin e Gjykatës Kushtetuese për datën e zgjedhjeve të ardhshme në Bashkinë e Tiranës, administrata aktuale ka intensifikuar aktivitetet e saj. Në tre ditët e fundit, Bashkia e Tiranës ka shpallur tre tendera për ndërtimin dhe asfaltimin e rrugëve në periferi të kryeqytetit, me një vlerë totale prej rreth 5 milionë euro.
Procedura e parë, shpallur më 21 tetor, ka të bëjë me “Ndërtimin e Unazës Mustafakoc-Veski-Kocaj”, që lidh pesë fshatra në Njësinë Administrative Baldushk, me një fond limit prej 1.5 milionë euro.
Dy tenderët e tjerë, të shpallur ditën e sotme, përfshijnë “Ndërtimin e rrugës Verri-Urë” në Njësinë Administrative Shëngjergj me vlerë 1.8 milionë euro, dhe “Ndërtimin e rrugës Pezë e Madhe-Pojan” në Njësinë Administrative Pezë me vlerë 1.6 milionë euro.
Bashkia e Tiranës kërkon që punimet për të tre rrugët të përfundojnë brenda 8 muajve nga lidhja e kontratës, që do të thotë rreth qershorit të vitit 2026. Megjithatë, nëse Gjykata Kushtetuese vendos që shkarkimi i Veliajt është i drejtë dhe hap rrugë për zgjedhjet e pjesshme në kryeqytet, këto kontrata mund të interpretohen si “asfalte elektorale”.
Një praktikë që bashkia ka ndjekur edhe gjatë fushatave të mëparshme të Erion Veliajt, kur restaurimi i rrugëve realizohej në periudha zgjedhore. Praktikë e cila duket se do të përdoret edhe për t’i çuar vota Ogerta Manastirliut.
