Deputeti i PS, Erion Braçe, ka kritikuar sot disa institucione shtetërore, përfshirë Ministrinë e Bujqësisë, për mungesën e përgjigjeve ndaj kërkesave për informacion që ai kishte paraqitur në kuadër të interpelancave me anëtarë të kabinetit qeveritar.
Gjatë fjalës së tij në seancën parlamentare, Braçe u shpreh se afatet ligjore për kthimin e përgjigjeve nga institucione si Ministria e Brendshme, Bashkia e Tiranës, Autoriteti i Mbikëqyrjes Financiare dhe Autoriteti Kombëtar i Ushqimit kishin përfunduar pa asnjë reagim zyrtar. Sipas tij, këto kërkesa lidhen me një interpelancë me ministrin e Brendshëm, dy interpelanca me ministrin e Infrastrukturës dhe një me ministrin e Bujqësisë.
Braçe shtoi se edhe ministri i Bujqësisë kishte refuzuar zhvillimin e interpelancës me argumentin e mungesës së kompetencës.
Deputeti socialist deklaroi se ligji për shërbimin veterinar ngarkon Ministrinë e Bujqësisë me përgjegjësi për problematikat që lidhen me kafshët shoqëruese dhe të braktisura, përfshirë shëndetin dhe trajtimin e tyre. Ai kërkoi gjithashtu sqarime mbi kontrollet e ushtruara ndaj organeve të pushtetit vendor për këtë çështje.
Në përfundim, Braçe paralajmëroi se nëse institucionet vijojnë të mos u përgjigjen kërkesave për informacion, atëherë vihet në pikëpyetje funksioni i interpelancave dhe i kontrollit parlamentar ndaj ekzekutivit.
Ndërsa vlen të theksohet, kur një deputet i mazhorancës has pengesa dhe neglizhencë, atëherë çfarë mund të thuhet për një qytetar të thjeshtë të marrë përgjigje apo zgjidhje nga institucionet publike.
