Kreu i Lëvizjes Bashkë, Arlind Qori, komentoi mbrëmjen e së shtunës në Euronews Albania deklaratat e kryebashkiakut të pezulluar të Tiranës, Erion Veliaj, gjatë seancës në Gjykatën Kushtetuese. Qori ka folur në emision lidhur fjalën e Veliajt në Kushtetuese ku shprehej se “nesër në vendin e tij mund të jetë dhe Flori, Ogerta apo Arlindi”, të cilët janë kandidat për Bashkinë e Tiranës.
Në reagimin e tij, Qori u shpreh se Veliaj po përpiqet të krijojë një barazim moral mes vetes dhe figurave të tjera politike, gjë që sipas tij është e papranueshme.
“Veliaj kërkon të vendosë ekuivalencë politike e morale midis vetes dhe meje, për të treguar se të gjithë jemi njësoj dhe se vetëm mundësia na ka lënë pa vjedhur. Por ai e ka vendin në burg, dhe duhej të ishte atje prej kohësh, për lejet shkatërruese në Tiranë, për tjetërsimin e trashëgimisë kulturore dhe për aferën e inceneratorit”, deklaroi Qori.
Ai shtoi se shkarkimi i Veliajt ishte një vendim i drejtë dhe se argumenti se një zyrtar nuk mund të largohet pa një vendim të formës së prerë është i pabazë.
“Nëse do të pritej një vendim përfundimtar, atëherë çdo pushtetar do të mund të zvarriste proceset pa fund, të tjetërsonte prova dhe të përfitonte nga privilegjet e pushtetit”, theksoi Qori.
Në fund, ai e ftoi Veliajn të bashkëpunojë me drejtësinë dhe të zbulojë personat me të cilët ka ndarë përgjegjësitë.
“Uroj që Veliaj të kthehet në bashkëpunëtor të drejtësisë, të tregojë bashkëfajtorët e tij dhe oligarkët me të cilët ka ndarë pushtetin. Ndërkohë, me aq mundësi sa i kanë mbetur, ai po përpiqet të përdorë daljet publike vetëm për propagandë mediatike”, përfundoi Qori.
