Kreu i Lëvizjes Bashkë, Arlind Qori, ka dhënë një intervistë të hapur lidhur me ambiciet e tij politike dhe mundësinë e kandidimit për kryetar të Bashkisë së Tiranës. Në një intervistë për mediat ai u shpreh se Lëvizja Bashkë do të propozojë një kandidat, por se vendimi final për emrin do të merret nga Këshilli Koordinues i partisë. Megjithatë, Qori nuk e ka përjashtuar mundësinë që kandidatura të jetë edhe e tij.
“Do të kemi një kandidat, por kush do të jetë, vendos Këshilli Koordinues i Lëvizjes Bashkë. Unë jam i gatshëm të marr përsipër çdo detyrë që më ngarkohet,” deklaroi ai.
Në të njëjtën kohë, Qori komentoi edhe përbërjen e qeverisë së re të kryeministrit Rama, duke theksuar se ministrat janë në një varësi të plotë prej tij. Sipas tij, ata nuk kanë personalitet politik dhe janë më shumë administratorë sesa figura politike me pavarësi.
“Si mund të bëhesh ministër pa e ditur? Këta njerëz janë të varur totalisht nga Edi Rama dhe nuk kanë pavarësi politike. Ministri duhet të jetë një figurë politike, jo vetëm një administrator,” tha Qori.
Derisa kandidatura e socialistes Ogerta Manastirliu për Bashkinë e Tiranës është bërë zyrtare, nga partitë e tjera ende nuk ka emra të konfirmuar. Pritet të shihet se kush do të jetë konkurrenca kryesore ndaj Manastirliut në garën për drejtimin e kryeqytetit.
