Gjykata e Apelit të Juridiksionit të Përgjithshëm vendosi këtë të enjte të lërë në fuqi vendimin e Gjykatës së Tiranës, e cila kishte përjashtuar kompaninë Mabco nga e drejta e votës dhe administrimit në shoqërinë koncesionare “Vlora International Airport”. Sipas këtij vendimi, Behgjet Pacolli është përjashtuar nga administrimi i aeroportit të Vlorës deri në gjykimin në themel të konfliktit mes tij dhe Valon Ademit të “2A Group”.
Përplasja mes dy aksionerëve të aeroportit të Vlorës nisi pasi kompania e Pacollit, Mabco S.A., kishte marrë një kredi prej 100 milionë eurosh nga një fond investimesh në Luksemburg, i quajtur “Delphos Compartment Bernina”, ndërsa fluksi i të ardhurave nga Aeroporti i Vlorës ishte lënë peng në favor të këtij fondi.
Duke akuzuar Pacollin se kishte vepruar në keqbesim dhe në kundërshtim me ligjin, Ademi kërkoi pezullimin e së drejtës së votës së Mabco-s, derisa çështja të shqyrtohej në themel. Gjykata e Tiranës e pranoi këtë kërkesë, vendim që u la në fuqi edhe nga Apeli.
Sipas Apelit, veprimet juridike me kontratën “Delphos” rrezikojnë hapur interesat publike dhe ato të ortakut Ademi.
Ndërkohë, teksa aksionerët përplasen mes tyre, punimet për ndërtimin e aeroportit duket se nuk do të përfundojnë sipas afateve të kontratës. Nga ana tjetër, Prokuroria e Tiranës, bazuar në kallëzimet e ndërsjella të aksionerëve, po heton për disa vepra penale.
