Kreu i Prokurorisë së Posaçme, Altin Dumani, gjatë një aktiviteti të organizuar nga Inspektorati i Lartë i Drejtësisë, deklaroi se institucioni që ai drejton përballet me një sërë sfidash të vazhdueshme.
Ai theksoi se ndër problemet kryesore janë mungesa e stafit dhe infrastruktura e pamjaftueshme, si dhe mbingarkesa procedurale me të cilën përballen prokurorët.
Dumani iu referua gjithashtu edhe presioneve politike dhe mediatike, duke nënvizuar rolin e rëndësishëm të kodeve etike në ruajtjen e pavarësisë së prokurorëve:
“Kodet etike janë muret mbrojtëse ndaj çdo forme presioni politik apo mediatik,” tha ai.
Sa i përket funksionimit të sistemit të administrimit të çështjeve, Dumani bëri të ditur se ai është aktiv, por ende jo në kapacitet të plotë.
“Shpresojmë që deri në fund të vitit të funksionojë në 110% të kapaciteteve,” shtoi ai.
Në fund, kreu i SPAK theksoi se përveç rezultateve konkrete, institucioni duhet të tregojë edhe maturi, etikë dhe integritet në zbatimin e ligjit, për të përmbushur misionin e tij në luftën kundër korrupsionit dhe krimit të organizuar.
