Anëtari i Këshillit Kombëtar të PD, Ilir Alimehmeti, ka komentuar protestën kombëtare të zhvilluar ditën e hënë dhe është shprehur se qeveria s’mund të bjerë më një protestë.
Në intervistën për Report TV, Alimehmeti ka theksuar se ndryshimi politik është një proces i gjatë dhe nuk ndodh brenda një dite.
“Nëse dikush pret që qeveria të bjerë me një protestë, kjo është diçka që nuk ka ndodhur në 35 vite. Ky është një proces, nuk do të bëhet çdo gjë në një ditë, do të kalojnë edhe ditë të tjera”, tha Alimehmeti.
Ai shtoi se partia ka kaluar periudha përgjumjeje dhe kishte nevojë për një zgjim politik. Alimehmeti thekson rëndësinë e organizimit të strukturave brenda partisë dhe të analizës së situatës zgjedhore që PD të jetë alternativë qeverisëse.
“Unë kam qenë aktiv që në 2023, ku kam theksuar se PD ka nevojë për një pajtim kombëtar brenda opozitës, duke bashkuar faktorët që duan të kontribuojnë kundër PS dhe për të rrëzuar Ramën. Mund të kemi mendime të ndryshme, por objektivin e kemi të njëjtë.
Mendoj se mund të kishte një mbledhje kryesie për këtë, nuk kishte pse të ishte diskutim në publik. Por situata e përgjumjes kërkonte një zgjim, zbritja në bazë, analiza zgjedhore dhe ngritja e grupeve të punës. Këshilli Kombëtar dhe protesta kombëtare u bënë për këtë qëllim. Tani ka nevojë që opozita të shkojë drejt alternativës qeverisëse”, tha ai.
Kujtojmë se Alimehmeti ishte një nga nismëtarët e takimeve me demokratët për të kërkuar ndryshime në lidershipin e PD. Por ai u shfaq vetëm në takimin hapës në qytetin e Durrësit. Pas pakënaqësive që shprehën drejtuesit e PD, ai nuk shkoi më në takimet e tjera, duke e lënë të vetëm Salianjin, i cili duket se po merr koston duke u përjashtuar nga partia.
