PD i ka numrat e mëdhenj, por kjo matet edhe me besimin që përcjell. Fitorja është e përbashkët, pavarësisht se mund të kemi mendime të ndryshme- me këto fjalë, Ilir Alimehmeti vulosi autokritikën finale dhe u shfaq publikisht në krah të Sali Berishës, gjatë Foltores së organizuar në zonën e Kombinatit në Tiranë.
Me këtë dalje Alimehmeti u zbyth përfundimisht nga një lëvizje ku ai i shfaq si protagonist duke kërkuar ndryshime në mënyrën e organizimit të PD.
Nga ana e tij, kryetari i PD-së, Sali Berisha, u ndal te situata politike në vend dhe perspektiva e opozitës, duke u shprehur se demokratët ndodhen “në agun e vërtetë të një fitoreje të pashmangshme në betejat e opozitës shqiptare”. Berisha u përpoq t’u japë zemër mbështetësve, duke e cilësuar momentin aktual si vendimtar për përballjen me qeverinë.
“Ja të vdesim, ja të rrojmë, Edi Ramën do e rrëzojmë”, ishte lajtmotivi që shoqëroi gjithë takimin, mes brohoritjeve të mbështetësve të pranishëm. Në fund të Foltores, drejtuesit e PD-së u bënë thirrje demokratëve të marrin pjesë masivisht në protestën kombëtare të thirrur nga Partia Demokratike më 24 janar, e cila pritet të jetë një tjetër test force për opozitën.
