Demokratja Alesia Balliu ka reaguar ashpër pas deklaratave të Sali Berishës, pasi akuzave të këtij të fundit se ajo ka bërë fushatë për parti të tjera dhe për këtë arsye u skualifikua nga gara për kryetare të PD.
Përmes një postimi në rrjetet sociale, Balliu i ka hedhur poshtë pretendimet, duke i kërkuar Berishës që të mos ua atribuojë demokratëve veprime që, sipas saj, lidhen me djalin e tij, Shkëlzen Berisha, në raport me kryeministrin Edi Rama.
“Sali, atë që bën Shkëlzeni me Ramën mos na e faturo ne”, shkruan Balliu, duke shtuar se drejtuesi i PD-së duhet të japë llogari për humbjen e mijëra votave dhe përçarjen brenda partisë.
Në reagimin e saj, ajo ngre disa pyetje mbi situatën politike dhe organizative të PD, duke përmendur edhe bashkëpunimin e këshillave bashkiakë me PS dhe biznesmenët, që sipas saj, janë të njëjtët që punuan si me qeverinë Berisha punojnë edhe me Ramën.
"Si ka mundësi që regjimi lejon “SYRIN” tënd të veprojë i lirë në çdo moment për të goditur këdo që nuk mendon si ty?
Si ka mundësi që biznesmenët që punonin me ty, punojnë edhe me Ramën?
Sali, kthe përgjigje para demokratëve: si ka mundësi që PD-ja, që nga 2021, është minus 300 mijë vota?", shkruan ndër të tjera ajo.
Balliu gjithashtu i rikujton Berishës shpalljen “non grata” nga Shtetet e Bashkuara disa vite më parë, duke kërkuar shpjegime përse kjo masë nuk është hequr ende.
Në fund ajo shprehet se nuk pret më përgjigje nga Berisha, pasi sipas saj ai nuk e kontrollon më Partinë Demokratike, të cilën e cilëson si një “klikë”. Ndërkohë, thekson se pret përgjigje nga Shkëlzen Berisha, për të cilin pretendon se ka marrëdhënie komunikimi me kryeministrin Rama.
Kujtojmë se Balliu ishte një nga kandidatet që u skualifikua nga gara për kryetar të PD. Në zgjedhjet e 23 majit Sali Berisha do të jetë emri i vetëm në garë, ndërsa anëtarësia nuk do të jetë në gjendje të zgjedhë, por thjesht do të votojë Po ose Jo, për konfirmimin e tij.
