Adriatik Lapaj ka vijuar edhe ditën e sotme me thirrjet ndaj partive opozitare për t’u bashkuar në një front kundër qeverisë. Në një prononcim për A2 CNN nga kryeministria ku po vijon protestën e tij, kreu i “Shqipëria Bëhet” deklaroi se ka një kohë për t’u zënë me njëri-tjetrin por ka dhe një kohë që duhet bashkuar kundër një të keqe më të madhe, që sipas tij është Edi Rama.
Lapaj pati dhe një mesazh të veçantë për Berishën i cili ka aleancën me shumicën e partive opozitare, për të cilin tha se Rama nuk rrëzohet me molotov por me qëndresë.
“Ne mund të mos e duam njëri-tjetrin, por e vërteta e madhe është që ka një kohë për t'u zënë, ka dhe një kohë për t'u bashkuar kundër një të keqe më të madhe. Koha kur mund të më sulmojnë mua si Adriatik, edhe ata që janë në opozitë, nuk është tani, është më vonë. Sot është koha që secili të shtrijë dorën dhe të bashkohet në një front të madh qytetar kundër hajdutërisë së madhe që ka kapur vendin. Qeveritë ikin me qëndresë, nuk ikin me kapsolla apo me Molotov 2-orarësh. Duhet qëndresë dhe duhet të bindet popullsia që e kanë seriozisht”, tha kreu i Shqipëria Bëhet.
Duket se palëve u ka ngelur që ta zbatojnë në terren aleancën politike, duke qenë se me deklarata publike Berisha dhe Lapaj janë në një mendje. Është e disata herë që shprehin nevojën që opozita të unifikohet përballë qeverisë së Ramës, dhe dita kur ta realizojnë përballë kryeministrisë, nuk duket shumë larg.
