Ministrja e Brendshme Albana Koçiu e cilësoi protestën e sotme si një tubim të dhunshëm, që sipas saj kishte për qëllim të drejtpërdrejtë goditjen e Policisë së Shtetit.
Në një deklaratë publike, Koçiu iu drejtua punonjësve të policisë duke theksuar se ata kanë të drejtën të reagojnë kur sulmohen, ndërsa njoftoi se i ka kërkuar Drejtorit të Përgjithshëm të Policisë të identifikojë dhe të nxjerrë para përgjegjësisë të gjithë ata që u bënë pjesë e dhunës.
“Protesta është e drejtë kushtetuese, por duhet të zhvillohet në mënyrë paqësore. Ajo që pamë sot ishte barbare. Qëllimi i protestës ishte goditja e Policisë së Shtetit”, tha ministrja.
Sipas Koçiut, gjatë përplasjeve janë dëmtuar disa efektivë: katër policë pësuan lëndime nga djegia e materialeve plastike, ndërsa 16 punonjës të tjerë po marrin aktualisht ndihmë mjekësore.
Në fund të deklaratës, ministrja i uroi shërim të shpejtë deputetit të PD-së, Bledion Nallbati, i cili u lëndua gjatë tensioneve dhe u shoqërua në QSUT për trajtim.
