Kreu i Partisë Mundësia, Agron Shehaj, ka paralajmëruar mbajtjen e zgjedhjeve të parakohshme pas vendimit të mazhorancës për të penguar arrestimin e Belinda Ballukut.
Në një status në rrjetin social Facebook, Shehaj thekson: "Është e qartë se pas vendimit të mazhorancës për të penguar arrestimin e Belinda Ballukut, duhet të shkojmë në zgjedhje të parakohshme. Nuk ka më asnjë kuptim që ndërkohë që drejtësia po heton dhe kërkon arrestimin e të korruptuarve, mazhoranca i merr në mbrojtje. Kjo mazhorancë nuk ka më legjitimitet."
Ai shtoi se qytetarët shqiptarë duhet të kenë mundësinë të zgjedhin midis drejtësisë dhe qeverisë aktuale, duke theksuar se vendimi për të mbrojtur të korruptuarit nga drejtësia është një moment historik që kërkon reagim nga qytetarët:
"Duhet që qytetarët shqiptarë të vendosin nëse kemi të bëjmë me një grusht shteti nga ana e drejtësisë, siç thotë Edi Rama, apo kemi të bëjmë me një drejtësi të vërtetë. Dhe këtë vendim mund ta marrin vetëm qytetarët shqiptarë."
Shehaj përfundoi duke nënvizuar rëndësinë e përgatitjes për zgjedhje të parakohshme:
"Duhet të bëhemi gati për zgjedhje të parakohshme. Ky është një moment historik për Shqipërinë. Më në fund ka drejtësi dhe të korruptuarit po dalin para drejtësisë; duhet që me votën tonë t'u tregojmë vendin."
