Agron Gjekmarkaj, në cilësinë e zëvendëskryetarit të Kuvendit, ka zhvilluar një vizitë në Hungari, ku është takuar me homologun hungarez, István Jakab, një prej figurave kryesore të partisë Fidesz të Kryeministrit Viktor Orbán.
Në njoftimin e takimit, Gjekmarkaj shprehet se, ndër të tjera, ka ngritur shqetësimet mbi situatën politike në vend, procesin zgjedhor të 11 majit dhe arrestimin e drejtuesve të opozitës, duke e cilësuar momentin si një provë të rëndësishme për demokracinë shqiptare.
“Informova gjithashtu z. Jakab mbi zhvillimet e fundit politike në Shqipëri, përfshirë deformimet e konstatuara në zgjedhjet e 11 majit, si dhe arrestimin e liderit të opozitës, z. Sali Berisha, dhe drejtuesve të tjerë opozitarë gjatë procesit zgjedhor, veprime që i sollën avantazh të padrejtë palës kundërshtare”, tha Gjekmarkaj.
Ndonëse takimi që ka zhvilluar deputeti i PD nuk ka ndonjë peshë, duhet theksuar se problemet i ka ngritur tek një përfaqësues i partisë së Viktor Orbán, ku ky i fundit njihet për miqësinë që ka me kryeministrin Edi Rama. Ndërsa shqetësimi për arrestimet e liderëve të opozitës dhe për zgjedhjet është hipokrizia e radhës që “eksporton” opozita tashmë përmes Gjekmarkajt. Kjo për faktin se, kur hetimet e SPAK shkojnë në derën e tyre, quhen goditje ndaj opozitës, ndërsa kur shkojnë në derën e mazhorancës, quhen goditje ndaj korrupsionit dhe narkoqeverisë.
Sa i përket zgjedhjeve, nga pamundësia për të frymëzuar shqiptarët që t’i votojnë me figurat e konsumuara brenda partisë dhe humbjeve të njëpasnjëshme, PD ka filluar të bojkotojë zgjedhjet me pretekstin se mbështesin “kandidatë të pavarur” që nuk i njeh askush.
Prandaj, më realist do ishte Gjekmarkaj t’i tregonte homologut hungarez ndonjë sarkazëm nga ato që shkruan pas çdo seance parlamentare, sesa të fabrikonte deklaratat e përditshme të Berishës.
