Kreu i Partisë Agrare Ambientaliste, Agron Duka, ka lënë të hapur mundësinë e kandidimit për kryetar të Bashkisë së Durrësit në zgjedhjet vendore të vitit 2027, duke theksuar se vendimi do të varet nga rrethanat dhe shanset reale për fitore.
Duka u shpreh se opozita ka potencial për të fituar një numër bashkish, por kjo varet kryesisht nga përzgjedhja e kandidatëve që gëzojnë besimin e qytetarëve. Ai pranoi se aktualisht situata nuk është në favor të opozitës në tërësi, megjithatë përmendi si raste pozitive Kavajën dhe mundësinë për një rezultat të mirë edhe në Durrës.
I pyetur nëse do të pranonte një ftesë nga opozita për të kandiduar, Duka theksoi se nuk përjashton asnjë opsion, duke nënvizuar se mund të garojë edhe nën siglën e Partisë Agrare Ambientaliste.
“Unë kam forcën time politike. Nëse shoh që ka gjasa për të fituar, mund të kandidoj edhe si përfaqësues i partisë sime. Madje mund të jetë edhe më e suksesshme, pasi mund të jetë një alternativë kundër të dyja palëve,” u shpreh ai.
