Kryetarja e Këshillit të Lartë të Prokurorisë, Mirela Bogdani, ka bërë publike afatet për përzgjedhjen e drejtuesve të rinj të dy institucioneve më të rëndësishme të drejtësisë, Byrosë Kombëtare të Hetimit (BKH) dhe Prokurorisë së Posaçme (SPAK).
Gjatë fjalës së saj në Kuvend, Bogdani tha se procesi për kreun e ri të BKH-së pritet të përmbyllet deri më 10 nëntor, pasi verifikimet e kandidatëve kanë zgjatur më shumë se parashikohej. Ndërkohë, për drejtuesin e ri të SPAK, procedura do të përfundojë në fillim të dhjetorit.
“Synojmë që zgjedhja e drejtuesit të ri të SPAK të bëhet përpara mbarimit të mandatit aktual, në mënyrë që tranzicioni të zhvillohet në mënyrë të natyrshme,” theksoi Bogdani, duke shtuar se procesi do të mbyllet përpara datës 16 dhjetor, kur përfundon mandati i drejtuesit aktual.
