Kreu i Lëvizjes “Shqipëria Bëhet”, Adriatik Lapaj, po vijon protestën e tij para godinës së Kryeministrisë, duke qëndruar ulur në karrige. Edhe pse një natë më parë tentoi të ngrinte çadra, policia ndërhyri dhe nuk e lejoi.
Në një video të postuar në rrjetin social Facebook, Lapaj shkruan se po shtohet numri i pjesëmarrësve, por në të vërtetë shumica duket se janë simpatizantë të partisë së tij dhe jo qytetarë të zakonshëm.
Kreu i lëvizjes ka deklaruar se protesta synon të denoncojë atë që ai e konsideron si sulm ndaj drejtësisë dhe institucioneve kushtetuese nga qeveria. Ai kërkon largimin e kryeministrit Edi Rama dhe tërheqjen e ndikimit mbi sistemin e drejtësisë, duke akuzuar zyrtarë për korrupsion dhe keqmenaxhim ekonomik.
Edhe pse ka zgjedhur një formë simbolike proteste, duke qëndruar ulur në karrige ditë e natë, duket se nuk po arrin të ndezë “shkëndijën” e dëshiruar për të nxitur mobilizim qytetar dhe për të tërhequr vëmendje mbi krizën sociale dhe mungesën e llogaridhënies nga qeveria.
