Kreu i lëvizjes Shqipëria Bëhet, Adriatik Lapaj, është rikthyer sonte sërish në protestë para Kryeministrisë, menjëherë pas përfundimit të Foltores së opozitës të mbajtur nga Sali Berisha në të njëjtin vend. Protesta e Lapajt vijon prej rreth 40 ditësh në këtë hapësirë, si shenjë kundërshtimi ndaj qeverisë.
Një natë më parë, rreth mesnatës, forca të shumta të Policisë ndërhynë duke hequr çadrat dhe karriget e vendosura nga protestuesit e Shqipëria Bëhet. Ndërhyrja u shoqërua me përplasje mes policisë dhe protestuesve, gjatë së cilës Adriatik Lapaj u dëmtua në kokë. Për shkak të gjendjes së tij, në vendngjarje u thirr ambulanca, e cila e transportoi për ndihmë mjekësore në spital.
Nga spitali, Lapaj bëri thirrje publike për një tjetër tubim, duke ftuar mbështetësit të mblidheshin sot në orën 19:00 para Kryeministrisë. Thirrja u pasua nga rikthimi i tij në protestë, këtë herë pa çadra dhe mjete ngrohëse, të cilat ishin hequr nga policia gjatë ndërhyrjes së një nate më parë.
I ulur në një karrige, i rrethuar nga dhjetëra mbështetës, Adriatik Lapaj deklaroi se nuk do të tërhiqet dhe se protesta do të vazhdojë. “Kjo nuk është republika e Edi Ramës, kjo është Republika e shqiptarëve. Unë do të vazhdoj të protestoj për vajzën time, për fëmijët e mi dhe për gjithë shqiptarët. Parardhësit tanë kanë luftuar për të çliruar këtë vend, ne duhet të luftojmë për të mbrojtur Shqipërinë”, u shpreh ai në fjalën e tij para Kryeministrisë.
Protesta e Shqipëria Bëhet pritet të vijojë edhe në ditët në vijim, pavarësisht ndërhyrjeve policore dhe tensioneve të shënuara gjatë natës së kaluar.
