Adriatik Lapaj nuk ka ende një përgjigje definitive për kandidimin e tij për kryebashkiak të Tiranës: “Edhe mundet, edhe mundet jo, ngelet për t’u parë”, tha ai për A2 CNN, duke e lënë mister qytetarëve.
Megjithatë, Lapaj premton angazhim maksimal: partia e tij do të punojë ditë për ditë për të performuar sa më mirë në zgjedhjet lokale, të mbledhë firma dhe të rrisë ndërgjegjësimin, duke e mbajtur procesin “në rrugën e duhur”. Por ironia është e qartë: i vetmi aleat i tij, Endri Shabani i “Nisma Thurje”, i ka dalë problematik dhe bashkëpunimi i parë përfundoi me sherr të madh.
Lapaj nuk e mbyll derën e koalicioneve: “Ne do të ecim drejt përpara, vetëm siç jemi. A mund të bëjmë marrëveshje me parti të tjera? Po patjetër. Se fakti që dështon njëherë në dashuri, nuk do të thotë se nuk do të dashurohesh më në jetë”. Por duket se, për momentin, bashkimi i tij i vetëm politik ka qenë më shumë burim sherri sesa i suksesit.
