Deputeti i Lëvizjes “Bashkë”, Redi Muçi, ka abstenuar në votimin e rezolutës së propozuar nga Partia Socialiste për shpalljen e Iranit si shtet sponsor të terrorizmit, duke e cilësuar nismën si politikisht të motivuar dhe të mbushur me standarde të dyfishta.
Gjatë fjalës së tij në Kuvend, Muçi sqaroi se qëndrimi i tij nuk përbën mbështetje për regjimin iranian. Ai dënoi represionin e autoriteteve të Teheranit ndaj protestuesve, veçanërisht ndaj të rinjve që, sipas tij, janë përballur me dhunë në protestat kundër regjimit.
Megjithatë, deputeti e kritikoi ashpër mazhorancën, duke e quajtur rezolutën një akt hipokrizie politike. Sipas tij, qeveria po ndjek një qasje selektive ndaj konflikteve ndërkombëtare dhe shkeljeve të të drejtave të njeriut, duke dënuar një palë ndërsa injoron të tjera.
Muçi përmendi edhe raportin e qeverisë shqiptare me Izraelin, duke theksuar se kryeministri Edi Rama është takuar me Benjamin Netanyahun, për të cilin ai tha se ekziston një urdhër arresti nga Gjykata Ndërkombëtare Penale për krime lufte dhe krime kundër njerëzimit.
Ai shtoi se rezoluta do të duhej të përfshinte edhe një thirrje për përfundimin e konfliktit në rajon, si dhe kujtoi se, sipas tij, para kësaj nisme Kuvendi duhet të kishte miratuar një rezolutë që dënon gjenocidin serb ndaj Kosovës.
