Kryeministri Edi Rama ka reaguar pas pretencës së Prokurorisë së Hagës, e cila kërkoi dënimin me 45 vite burg për katër ish-krerë të UÇK-së. Në një reagim emocional, Rama shprehet se është pyetur nga miq nga Prishtina përse nuk është shprehur më herët publikisht për mikun e tij, por thekson se mungesa e reagimit nuk vjen nga indiferenca.
“Sinqerisht, nuk po shprehem dot,” shprehet Rama, duke theksuar se ende po përpiqet të kuptojë logjikën mbi të cilën Prokuroria ka ndërtuar këtë kërkesë të rëndë dënimi. Sipas tij, bëhet fjalë për një vendim që ai e përjeton si “një varrosje për së gjalli” të katër burrave.
Kryeministri nënvizon se, ndryshe nga herët e tjera, fjalët nuk po i vijnë në ndihmë për të shprehur indinjatën dhe tronditjen që ndjen, duke kërkuar kohë për ta përballuar atë që e cilëson si një padrejtësi të rëndë të prodhuar “në zemër të Europës demokratike”.
Reagimi i Ramës vjen pas pretencës së Hagës, ndërsa vijon të shkaktojë reagime të forta në opinionin publik shqiptar.
