Protesta e gjashtë kombëtare e opozitës u zhvillua në ditën kur, 34 vjet më parë, PD fitoi zgjedhjet pluraliste për herë të parë. Si atë ditë të marsit 1992, edhe sot në krye të mitingut ishte Sali Berisha. Vetëm se këtë herë ai nuk foli para mbështetësve dhe, në vend të fjalës, vendoste herë pas here maskën kundërgaz për t’u mbrojtur nga reagimi i policisë.
Thuajse me të njëjtin skenar si protestat pararendëse, edhe kjo e sotmja u shoqërua me hedhje fishekzjarresh dhe molotovësh, duke mos kursyer edhe Ministrinë e Brendshme. Në koreografinë e protestës ishte shtuar sot flamuri gjerman, krahas atij të PD dhe të BE. Me gjasë një shenjë se kur një zyrtar i Gjermanisë kalon pragun e PD, kjo e fundit i shton gjerdanit të saj të mbështetjes edhe flamurin e shtetit përkatës.
Ndërkaq, duke vijuar ecjen në bulevard, gardhi policor mbrojti fort selinë e PS, e cila i shpëtoi zemërimit të protestuesve që arritën të djegin një makinë policie. Protestuesit vijuan nga selia e PS drejt Drejtorisë së Policisë dhe më tej itinerari vijoi nga sheshi Wilson tek RTSH, atje ku policia kishte vendosur një kordon mbrojtjeje në daljen e rrugës drejt urës.
Pranë godinës së AKSHI-t, protestuesit dhe policia u përplasën sërish mes bombave molotov dhe gazit lotsjellës. Përpjekja për të sulmuar Parlamentin rezultoi e dështuar, përveç përplasjeve fizike mes disa deputetëve të PD dhe policisë.
Protesta përfundoi me një fjalim të Sali Berishës në selinë e PD, ku u shpall, si gjithmonë, fundi i qeverisë Rama.
