Drama e tre fëmijëve të gjetur në gjendje të mjeruar mbrëmjen e së dielës nga policia në Durrës ishte kryefjala e lajmeve, ku si përherë palët e përfshira nisën akuzat dhe kundërakuzat në kurriz të tre qenieve të pafajshme.
Videot e shpërndara në rrjet, të cilat VNA i censuroi për shkak të të miturve që shfaqeshin në to, tregonin tre fëmijë në gjendje të tmerrshme, të paushqyer dhe të lënë në mëshirë të fatit prej ditësh.
Policia e Durrësit lau duart duke nisur procedim penal ndaj nënës së fëmijëve, e cila pas më shumë se tre ditësh që i kishte lënë të vegjlit në këtë situatë të mjerueshme, gjeti kohën dhe fuqinë të akuzonte vjehrrën, e cila sipas saj po i përdorte fëmijët kundër. Sepse zonja me inicialet B.B., 33 vjeçe nga Durrësi, me profesion kamariere, punonte, por thjesht “nuk kishte pasur kohë dhe mundësi” të kujdesej për fëmijët.
Por nuk mbaron me kaq.
Kjo dramë e dhimbshme familjare, ku varfëria dhe skamja janë kaq të pranishme dhe kaq të dhimbshme për jetën e tre të miturve, merret dhe përdoret për propagandë edhe nga Ministria e Shëndetësisë.
“Do të mblidhet grupi ndërsektorial për të vendosur mbi masat e mëtejshme për mbrojtjen e fëmijëve”, shkruhet në deklaratën e ministrisë, ku sërish shfaqen – edhe pse me sytë e mbuluar – tre fëmijët që kalojnë dorë më dorë e derë më derë si plaçkë lufte. Njëherë mes familjarëve, pastaj policisë dhe më tej ministrisë së Shëndetësisë.
Si për të na kujtuar se humanizmi ka vdekur dhe bashkë me të edhe ndjeshmëria për të qenë, para së gjithash, njerëz, e për t’i ruajtur këta fëmijë nga përdorimi.
Sot ka dhjetëra, në mos qindra shqiptarë, të gatshëm t’i ndihmojnë këta fëmijë të ushqehen, të lahen, të vishen dhe të shkojnë në shkollë. Solidariteti nuk mungon. Por edukatën, sigurinë dhe dinjitetin nuk ua jep dot askush përveç familjes — dhe kur ajo dështon, shteti nuk ka të drejtë të bëjë propagandë, por vetëm detyrimin të mbrojë.
Sepse fëmijët nuk janë as alibi, as justifikim, as material për deklarata. Janë jetë që po rriten mes neglizhencës, varfërisë dhe indiferencës sonë kolektive.
