Zjarri në pallatin e ndërtuar nga kompania ARLIS CONSTRUCTION në Rrugën 5 Maji ka rikthyer një debat të vjetër për sigurinë e ndërtimeve të reja në Tiranë. Ndërsa flakët u përhapën me shpejtësi në fasadë, dyshimet lidhen me materialet e përdorura gjatë ndërtimit.
Sipas të dhënave paraprake, gjatë aplikimit të fasadës së ventiluar nuk është përdorur leshi i gurit – materiali standard antizjarr që përdoret për izolim – por shkumë mbushëse PU Foam. Ky material është shumë më i lirë, përdoret zakonisht për mbushje dhe është i djegshëm, pasi përbëhet nga përbërje me bazë metili dhe nënprodukte nafte.
Pikërisht kjo mund të ketë bërë që fasada të marrë flakë dhe zjarri të përhapet shumë shpejt në pjesën e jashtme të godinës.
Ngjarja ndodh në një moment kur në Tiranë po ndërtohen me ritme të larta dhjetëra pallate të reja dhe kur siguria e materialeve të përdorura në fasada është kthyer në një çështje të rëndësishme për banorët.
Zjarri i sotëm është një kujtesë e fortë se kursimi në materiale ndërtimi nuk është thjesht çështje kostoje – por edhe sigurie publike. Në një qytet që rritet çdo ditë në lartësi, cilësia e ndërtimit nuk është luks, por domosdoshmëri.
