Sting ka rikthyer debatin mbi trashëgiminë dhe pasurinë familjare, duke deklaruar se nuk ka ndërmend t’u lërë fëmijëve të tij pasuri të mëdha pa kushte.
Në një intervistë për emisionin CBS Sunday Morning me gazetarin Mark Phillips, artisti 73-vjeçar u shpreh se një jetë e garantuar financiarisht mund t’u dëmtojë motivimin dhe ndjenjën e përgjegjësisë fëmijëve.
“Mendoj se gjëja më e keqe që mund t’i bësh një fëmije është t’i thuash se nuk ka nevojë të punojë. Kjo është një formë abuzimi, shpresoj të mos jem kurrë fajtor për të,” deklaroi këngëtari britanik.
Sting konfirmoi se nuk planifikon të krijojë trust fund-e të mëdha për gjashtë fëmijët e tij, pasi beson se pasuria nuk duhet të shërbejë si garanci për një jetë pa përpjekje personale.
Sipas artistit, detyra e një prindi është të sigurojë edukimin dhe mbështetjen bazë, ndërsa pjesa tjetër duhet të fitohet me punë dhe përkushtim.
“Po i shpenzoj paratë tona. Po ju paguaj shkollimin. Keni gjithçka që ju nevojitet. Tani shkoni në punë,” tha ai.
