Marka e famshme e Kim Kardashian, ‘Skims’, është paditur nga një stiliste e vogël nga Nju Jorku për përdorimin e emrit “Fits Everybody” në koleksionin e saj të të brendshmeve.
Sipas dokumenteve të siguruara nga Page Six, perandoria e modës e yllit televiziv po përballet me një padi për koleksionin e saj masiv, ndërsa marka më e vogël “Fits Everybody To A T” pretendon se ka pasur tashmë të drejtat ligjore mbi këtë emër.
Në padinë prej 43 faqesh për shkelje të markës tregtare, e ngritur më 31 mars në emër të stilistes Denise Cesare, pretendohet se ‘Skims’ ka vazhduar me lançimin e koleksionit edhe pasi ka marrë “njoftime të përsëritura dhe të qarta” për të drejtat e biznesit të vogël.
Avokatët e stilistes akuzojnë ‘Skims’ se ka marrë një “vendim të llogaritur” për përdorimin e emrit, duke pretenduar se kompania e Kim Kardashian ka përdorur “burimet e saj të jashtëzakonshme financiare, lidhjet me të famshëm dhe makinerinë e marketingut për të shtypur” biznesin e vogël, duke e ditur se ai nuk ka të njëjtat mundësi mbrojtjeje ligjore.
Për këtë arsye, Cesare kërkon nga gjykata ndalimin e përdorimit të emrit nga Skims, si dhe dëmshpërblim për fitimet e humbura dhe kostot ligjore.
Kim Kardashian e lançoi markën Skims në vitin 2019, e cila sot vlerësohet rreth 5 miliardë dollarë, ndërsa marka e Cesare ka shitur veshje dhe rroba banje me emrin “Fits Everybody To A T” për gati 10 vite.
Sipas padisë, një nga shqetësimet kryesore është se ngjashmëria e emrave po krijon konfuzion dhe rrezikon të zhdukë identitetin e markës së vogël, e cila është bërë “efektivisht e padukshme” në rezultatet e kërkimit në internet.
