Për shumë njerëz ideja e një birre në mëngjes duket e çuditshme, por për pasagjerët që prisnin fluturimet në aeroportin e Stansted-it në Londra, një pintë para nisjes konsiderohet pjesë e ritualit të pushimeve.
Debati u ndez pasi shefi i Ryanair, Michael O’Leary, propozoi ndalimin e shitjes së alkoolit në aeroporte para fluturimeve të hershme, duke argumentuar se sjelljet problematike të pasagjerëve po shtohen ndjeshëm. Sipas tij, kompania po detyrohet të devijojë pothuajse një fluturim në ditë për shkak të incidenteve të lidhura me sjelljen agresive në bord.
Por shumë udhëtarë nuk bien dakord.
“Është ritual pushimesh,” tha Dee Wood, një 60-vjeçare që po pinte birrë para fluturimit për në Alicante. Shoqja e saj, Rachel Almond, shtoi se për ta nuk bëhet fjalë për dehje, por për simbolikën e nisjes së pushimeve. “Ngremë gotat, themi ‘gëzuar’ dhe nisemi,” tha ajo.
Edhe Michelle Webb, e cila kishte zgjedhur verë në vend të birrës, tha se nuk do të pinte alkool në atë orë në kushte normale, por aeroporti krijon një ndjesi tjetër. “Është diçka ndryshe nga rutina,” u shpreh ajo.
Pasagjerët pranojnë se alkooli ndonjëherë mund të çojë në sjellje problematike në avion, por mendojnë se ndalimi total është i ekzagjeruar. Madje, disa kujtojnë fluturime festive që u janë dukur pjesë e bukur e pushimeve.
“Një herë avioni u kthye në autobus feste,” tregoi Wood, duke kujtuar një udhëtim para kurorëzimit të Charles III, ku kishte këngë dhe humor gjatë gjithë fluturimit. “Askush nuk po shqetësonte të tjerët. Ishte thjesht atmosferë festive.”
Edhe 24-vjeçarja Cerys Parnell, që po fluturonte drejt San Sebastián, e konsideron birrën e mëngjesit si “simbol relaksi dhe arratisjeje nga rutina”.
Ndërkohë, shefi i JD Wetherspoon, Tim Martin, e quajti propozimin e O’Leary “një reagim të tepruar” dhe praktikisht të vështirë për t’u zbatuar.
Jo të gjithë pasagjerët zgjodhën alkool. Disa preferuan çaj ose pije joalkoolike, por edhe ata thanë se nuk kanë problem me ata që pinë një birrë para nisjes. “Është pjesë e kulturës britanike kur njerëzit nisen për pushime,” tha Sean Ryan, një trajner futbolli që po udhëtonte drejt jugut të Franca.
