Zyrtarët dhe ekspertët shëndetësorë në Mbretërinë e Bashkuar kanë hedhur poshtë deklaratat e presidentit amerikan Donald Trump, i cili së fundmi sugjeroi se përdorimi i paracetamolit gjatë shtatzënisë mund të lidhet me rritjen e rasteve të autizmit tek fëmijët.
Duke folur të hënën, Trump u shpreh se ka pasur një “rritje meteorike” të rasteve të autizmit dhe ngriti dyshime se përdorimi i Tylenol-it – emri tregtar i paracetamolit në Shtetet e Bashkuara – mund të ishte një nga faktorët.
Këto komente janë kundërshtuar menjëherë nga autoritetet shëndetësore britanike. Sekretari i Shëndetësisë në Mbretërinë e Bashkuar, Wes Streeting, reagoi ashpër duke theksuar se nuk ekziston asnjë provë shkencore që ta mbështesë një pretendim të tillë.
“Sinqerisht, unë u besoj mjekëve më shumë se presidentit Trump për çështje mjekësore. Dua të jem shumë i qartë: nuk ka asnjë provë që të lidhë përdorimin e paracetamolit nga gratë shtatzëna me autizmin tek fëmijët. Aspak,” – deklaroi Streeting.
Ai iu referua gjithashtu një studimi të madh të kryer në Suedi dhe të publikuar vitin e kaluar, i cili përfshiu 2.4 milionë fëmijë, dhe që nuk gjeti asnjë lidhje mes përdorimit të paracetamolit gjatë shtatzënisë dhe rritjes së rrezikut për autizëm.
“Unë do t’u thoja të gjithë atyre që po na ndjekin: mos i kushtoni aspak vëmendje asaj që thotë Donald Trump për çështjet e mjekësisë. Madje, mos më besoni as mua si politikan – dëgjoni mjekët britanikë, shkencëtarët dhe sistemin shëndetësor britanik,” – shtoi ai.
Në të njëjtën linjë, Agjencia Evropiane e Barnave (EMA) konfirmoi se nuk ka asnjë provë të re që do të ndryshonte udhëzimet ekzistuese për përdorimin e paracetamolit gjatë shtatzënisë. Edhe Organizata Botërore e Shëndetësisë (OBSH) reagoi përmes zëdhënësit të saj, Tarik Jasarevic, i cili theksoi se lidhja mes paracetamolit dhe autizmit “mbetet e paqëndrueshme dhe e pavërtetuar”.
Ekspertët janë të qartë: paracetamoli është i sigurt për përdorim gjatë shtatzënisë, kur merret në përputhje me udhëzimet mjekësore. Nuk ka asnjë provë shkencore që ky medikament lidhet me zhvillimin e autizmit tek fëmijët
