Historia e Camila Rodrigues Cardoso, një 21-vjeçare braziliane që hoqi dorë nga karriera në modeling dhe konkurset e bukurisë për t’iu përkushtuar jetës fetare, ka shkaktuar reagime të shumta dhe polemika në rrjetet sociale.
E njohur më parë si një nga emrat premtues të bukurisë në Brazil dhe fituese e titullit Miss Continente Teen Sol Nascente, Camila tani njihet si Motër Eva dhe është pjesë e Kishës Ortodokse në Brazil. Një video e publikuar në vitin 2025, ku ajo shfaqet me veshje fetare duke folur për jetën e saj në një komunitet rural, është bërë virale, duke mbledhur miliona shikime.
Pamja dhe zgjedhja e saj kanë nxitur debate, veçanërisht për shkak se komuniteti fetar ku ajo bën pjesë lejon grim dhe përdorimin e telefonit, gjë që ka vënë në dyshim vërtetësinë e jetës së saj monastike nga disa përdorues. Në të njëjtën kohë, shumë të tjerë e kanë mbrojtur vendimin e saj, duke e cilësuar si një akt të fortë besimi dhe shkëputjeje nga presionet e botës së jashtme.
Sipas deklaratave të saj, Camila u tërhoq nga bota e modës pas një krize të thellë personale, të ndikuar edhe nga humbja e babait të saj. Ajo ka thënë se karriera në modeling nuk i plotësonte më boshllëqet emocionale. Sot, Motër Eva punon me fëmijë në zona të varfra dhe shprehet e vendosur t’ia kushtojë jetën shërbimit fetar dhe shoqërisë, pavarësisht kritikave dhe vëmendjes publike.
