Duke nisur nga sot, Bashkia e Romës (Campidoglio) vendos një sistem të ri tarifimi për Fontanën e Trevit: 2 euro për hyrjen e kontrolluar në zonën përballë basenit të shatërvanit, një prej simboleve më të njohura të kryeqytetit italian.
Bileta do të kërkohet:
nga e hëna në të premte, nga ora 11:30 deri në 22:00
në fundjavë, nga ora 9:00 deri në 22:00, me hyrjen e fundit në orën 21:00
Vetëm për ditën e parë të zbatimit të masës, orari do të jetë nga ora 9:00 deri në 22:00, bëri të ditur Campidoglio.
Hyrja do të mbetet falas për banorët e Romës dhe të Qytetit Metropolitan, me paraqitjen e dokumentit të identitetit, si dhe për personat me aftësi të kufizuara dhe shoqëruesit e tyre, fëmijët nën 6 vjeç dhe guidat turistike.
Fontana, e porositur nga Papa Klementi XII dhe e realizuar nga arkitekti Nicola Salvi, do të jetë gjithsesi e dukshme falas për të gjithë pas orës 22:00. Vendimi vjen pas një periudhe njëvjeçare testimi, gjatë së cilës u regjistruan mbi 10 milionë vizitorë, me një mesatare prej 30 mijë hyrjesh në ditë dhe kulme deri në 70 mijë.
Sistemi i ri i biletave nuk do të kufizohet vetëm te Fontana di Trevi. Nga 3 shkurti, hyrja me pagesë do të aplikohet edhe për pesë site monumentale dhe muzeale që deri më tani ishin falas: Villa di Massenzio, Muzeu Napoleonik, Muzeu i Skulpturës së Lashtë Giovanni Barracco, Muzeu Carlo Bilotti dhe Muzeu Pietro Canonica, me një tarifë prej 5 eurosh. Ndërkohë, muzetë dhe sitet kapitoline do të vazhdojnë të jenë falas për banorët dhe studentët që jetojnë ose studiojnë në Romë dhe provincë.
Vendimi ka ngjallur kritika. Sipas Rachele Mussolini, kryetare e grupit të Forza Italia në Campidoglio, “hyrja me pagesë në Fontanën e Trevit për jo-rezidentët është jo vetëm e palogjikshme, por edhe në kundërshtim të plotë me politikat e kryeqyteteve të tjera të mëdha evropiane”. Edhe më kritik është Assoturismo i Romës dhe Lazios, që e cilëson masën si “një qasje provinciale që e kthen në mall edhe atë që nuk duhet të komercializohet”.
Nga ana e saj, Bashkia shpjegon se paralelisht me sistemin e ri janë nisur edhe ndërhyrje në rrethim, me qëllim mbrojtjen e zonës së poshtme të shatërvanit dhe menaxhimin e flukseve të vizitorëve nga Via della Stamperia. Instalimet, theksohet, janë plotësisht të kthyeshme.
