Një nga figurat më të njohura të ekstremit të djathtë në Gjermani, Sven Liebich, i dënuar në korrik 2023 me 1 vit e gjysmë burg pa lirim me kusht për nxitje urrejtjeje dhe fyerje publike, do të vuajë dënimin në një burg për gra.
Kjo pasi Liebich, i cili ndër vite ishte bërë i njohur për aktivitetet e tij ekstremiste dhe shitjen e materialeve provokuese, ka ndryshuar ligjërisht gjininë dhe emrin në Marla-Svenja Liebich. Ndryshimi u bë i mundur falë Aktit të Vetëvendosjes, një ligj i ri që hyri në fuqi në nëntor 2024, i cili lejon deklarimin e gjinisë vetëm përmes një kërkese personale në zyrën e gjendjes civile.
Prokuroria e Halle-s ka urdhëruar që Liebich të paraqitet në burgun e Chemnitz-it, ku sipas rregullave të ekzekutimit të dënimeve, do të vendoset fillimisht në repartin e grave. Vetë i dënuari e bëri publike thirrjen për të nisur vuajtjen e dënimit në një postim në Platformën X.
Ky vendim ka shkaktuar zemërim dhe debat të gjerë publik në Gjermani. Kritikët paralajmërojnë për rrezikun e abuzimit me ligjin e ri, duke theksuar se persona të rrezikshëm mund ta përdorin vetëdeklarimin e gjinisë për të përfituar kushte më të lehta në sistemin penitenciar. Nga ana tjetër, autoritetet gjermane kanë lënë të hapur mundësinë e një transferimi të Liebich nëse vlerësohet se qëndrimi i tij rrezikon sigurinë e të burgosurve të tjerë.
Rasti i Marla-Svenja Liebich tashmë është bërë një test i ndjeshëm për ligjin e ri dhe për mënyrën se si sistemi gjerman do të balancojë të drejtat individuale me sigurinë publike.
