Gjyqtari amerikan Frank Caprio, i njohur për dhembshurinë e tij të veçantë në sallën e gjyqit, është ndarë nga jeta në moshën 88-vjeçare. Lajmi u konfirmua nga familja e tij përmes një deklarate të shpërndarë në rrjete sociale, raporton CNN.
Caprio shërbeu për katër dekada në Gjykatën e Qarkut në Providence dhe u bë i famshëm në mbarë botën për qasjen e tij humane ndaj drejtësisë. Seriali televiziv “Caught in Providence”, ku ai dëgjonte me ngrohtësi historitë e qytetarëve, e bëri atë të dashur për miliona njerëz dhe i solli një nominim për çmimin Daytime Emmy në vitin 2021. Klipet nga seancat e tij gjyqësore u bënë virale, duke e kthyer në një figurë ikonike të drejtësisë me shpirt njerëzor.
Pas njoftimit të largimit nga detyra në fillim të vitit 2023, Caprio zbuloi se vuante nga kanceri i pankreasit. Familja e tij e përshkroi si një njeri që “la një trashëgimi të thellë mirësie dhe drejtësie” dhe u bëri thirrje njerëzve të nderojnë kujtimin e tij duke përhapur më shumë dhembshuri, ashtu siç ai bëri gjatë gjithë jetës së tij.
