Dy kompani të mbështetura nga Elon Musk kanë paditur zyrtarisht Apple dhe OpenAI, duke i akuzuar se kanë bashkëpunuar në mënyrë të paligjshme për të bllokuar konkurrencën nga rivalët potencialë.
Padia, e depozituar në SHBA nga X dhe xAI, ka në shënjestër vendimin e Apple për të integruar chatbot-in e OpenAI në sistemet operative të iPhone-ve, një marrëveshje ekskluzive që – sipas tyre – shkel ligjin e konkurrencës.
Kjo lëvizje vjen pas kërcënimeve publike që Musk kishte bërë më herët këtë muaj, kur akuzoi Apple se favorizonte OpenAI në renditjen e aplikacioneve në App Store.
Apple nuk ka dhënë ende një koment, ndërsa OpenAI e cilëson padinë si pjesë të “sjelljes së vazhdueshme të ngacmimit nga Musk”.
Musk dhe Sam Altman themeluan së bashku OpenAI në vitin 2015, por më pas rrugët e tyre u ndanë, duke u kthyer në rivalë të hapur. Musk e ka akuzuar Altman se e ka larguar OpenAI nga misioni fillestar i së mirës publike, ndërsa vetë Musk ka krijuar kompani rivale si xAI dhe chatbot-in Grok.
Në padi, e cila është paraqitur në një gjykatë federale në Teksas, kompanitë e Musk pretendojnë se marrëveshja Apple–OpenAI nuk ka asnjë arsye të vlefshme biznesi për të qenë ekskluzive, duke argumentuar se ky bashkëpunim:
ka kufizuar konkurrencën mes chatbot-ëve gjenerues,
ka penguar rivalët të arrijnë shkallën e nevojshme të përdorimit,
ka ulur cilësinë dhe inovacionin.
Padia thekson gjithashtu se marrëveshja i dha ChatGPT një avantazh në App Store, duke rritur shkarkimet në krahasim me rivalët.
Sipas saj, OpenAI kontrollon rreth 80% të tregut të chatbot-ëve gjenerues në SHBA, ndërsa Apple zotëron rreth 65% të tregut të smartfonëve.
Apple dhe praktikat e saj në App Store kanë qenë shpesh objekt i betejave ligjore, përfshirë një padi të profilit të lartë kundër Google për çështje monopoli. Megjithatë, kompania ka mbrojtur vazhdimisht politikat e saj, duke thënë se janë “të drejta dhe paanshme”.
Pavarësisht marrëveshjes me OpenAI, rivalë si DeepSeek dhe Perplexity kanë arritur të kryesojnë herë pas here listat e aplikacioneve në App Store që nga viti 2024.
Ndërkohë, Apple raportohet gjithashtu se është në bisedime me Google për të përdorur chatbot-in Gemini si pjesë të përmirësimeve të asistentit zanor Siri.
