Një juri në shtetin amerikan të New Mexico vendosi të martën se kompania Meta Platforms ka shkelur ligjin shtetëror në një padi të ngritur nga prokurori i përgjithshëm i shtetit, i cili e akuzoi kompaninë se ka mashtruar përdoruesit për sigurinë e platformave Facebook, Instagram dhe WhatsApp, si dhe se ka mundësuar shfrytëzim seksual të fëmijëve në këto rrjete.
Pas më pak se një dite diskutimesh, juria vendosi se Meta ka shkelur ligjin për mbrojtjen e konsumatorit në New Mexico dhe urdhëroi kompaninë të paguajë 375 milionë dollarë gjobë civile.
Ky është rasti i parë kur një juri merr një vendim të tillë ndaj Meta-s, ndërsa kompania po përballet me një valë padish që lidhen me ndikimin e platformave të saj në shëndetin mendor të të rinjve.
Një zëdhënës i Meta-s tha se kompania nuk pajtohet me vendimin dhe do ta apelojë atë. “Ne punojmë fort për të mbajtur njerëzit të sigurt në platformat tona dhe jemi të qartë për sfidat që lidhen me identifikimin dhe largimin e personave që shpërndajnë përmbajtje të dëmshme,” thuhet në reagim.
Ndërkohë, prokurori i përgjithshëm i New Mexico, Raúl Torrez, e quajti vendimin “një fitore historike për çdo fëmijë dhe familje që kanë paguar çmimin e zgjedhjes së Meta-s për të vendosur fitimin mbi sigurinë e fëmijëve”.
Në fazën e dytë të procesit gjyqësor, që pritet të zhvillohet në maj, zyra e prokurorit do t’i kërkojë gjykatës të detyrojë Meta-n të bëjë ndryshime në platformat e saj për të mbrojtur fëmijët, si dhe të vendosë sanksione të tjera financiare.
Gjatë gjyqit gjashtëjavor në Santa Fe, autoritetet akuzuan Meta-n se ka lejuar që predatorët seksualë të kenë qasje të lirë te përdoruesit e mitur dhe t’i lidhin ata me viktima, duke çuar shpesh në abuzime në jetën reale dhe trafikim njerëzor.
