Një grup studiuesish në Korenë e Jugut ka zhvilluar lente kontakti të posaçme që mund të trajtojnë depresionin përmes stimulimit elektrik të trurit, pa përdorur ilaçe apo ndërhyrje kirurgjikale.
Studimi është realizuar nga Universiteti Yonsei në Seul dhe është publikuar në revistën shkencore Cell Reports Physical Science. Testet e para janë kryer te minjtë dhe, sipas studiuesve, rezultatet kanë qenë të krahasueshme me efektin e antidepresantit Prozac.
Lentet, të cilat janë të buta dhe transparente, përmbajnë elektroda ultra të holla që dërgojnë impulse elektrike në retinë. Nga aty, sinjalet përhapen drejt zonave të trurit që lidhen me humorin, si hipokampusi dhe korteksi prefrontal.
Pas tre javësh trajtim me seanca 30-minutëshe në ditë, minjtë e trajtuar me lentet treguan përmirësim të sjelljes, ulje të hormoneve të stresit dhe rritje të serotoninës në tru. Studiuesit raportuan gjithashtu rikthim të lidhjeve nervore që dëmtohen nga depresioni.
Sipas ekipit kërkimor, kjo teknologji mund të hapë rrugë të reja jo vetëm për trajtimin e depresionit, por edhe të ankthit, varësive dhe problemeve njohëse.
Megjithatë, ekspertët theksojnë se studimi është ende në fazë shumë të hershme dhe se teknologjia duhet të testohet më tej përpara se të përdoret te njerëzit.
