Aktorja Julia Roberts vjen me një rol të jashtëzakonshëm në filmin më të ri të regjisorit italian Luca Guadagnino, After the Hunt, premierë në Festivalin e Venecias. Kritikët e kanë cilësuar atë si “qendra monumentale” e këtij dramë provokuese, duke e renditur mes performancave më të fuqishme të karrierës së saj.
Një histori e nxehtë në kampusin e Yale
Roberts luan rolin e Alma-s, një profesoreshë filozofie në Universitetin Yale, e respektuar dhe e adhuruar nga studentët dhe kolegët. Por jeta e saj përmbyset kur një studente (Ayo Edebiri) i rrëfen se është ngacmuar nga një koleg dhe mik i ngushtë i saj, Hank (Andrew Garfield). Alma përballet me një dilemë të fortë morale mes besnikërisë, ambicies dhe drejtësisë.
Një film mbi temat e sotme
Guadagnino sjell në qendër çështje të debatueshme si feminizmi, kultura e anulimit, politika e identitetit dhe hendeku mes brezave. Megjithatë, sipas kritikëve, ngarkesa e tepërt me filozofi, subplot-e dhe stilizime të tepruara nga regjisori bëjnë që drama të duket më shumë si një projekt intelektual sesa një histori që të përfshin plotësisht.
Julia Roberts, më e fuqishme se kurrë
Ndryshe nga lojërat e zhurmshme të Garfield dhe Stuhlbarg, Roberts e ndërton me finesë rolin e saj: një personazh i përmbajtur, por i tensionuar si “një sustë e mbledhur”, ku çdo shikim dhe çdo heshtje bart një forcë të madhe dramatike. Kjo paraqitje po cilësohet si kandidatura më serioze e saj për një Oscar të dytë, 25 vite pas triumfit me Erin Brockovich.
After the Hunt shihet si një nga filmat më provokues të vitit, dhe pavarësisht mangësive, falë Julia Roberts pritet të dominojë diskutimet dhe garën për çmimet më të mëdha të kinemasë.
