Duka dhe Dukesha e Sussex-it kanë njoftuar zgjatjen e bashkëpunimit të tyre me Netflix për realizimin e filmave dhe serialeve, në kuadër të një marrëveshjeje “shumëvjeçare, me të drejtë të parë”, që i jep platformës së transmetimit të drejtën e parë për të shqyrtuar projektet e kompanisë së tyre “Archewell Productions”.
Marrëveshja e re, më fleksibël se ajo e mëparshmja e nisur në vitin 2020 dhe e vlerësuar rreth 100 milionë dollarë, hedh poshtë zërat se çifti do të ndërpriste bashkëpunimin me Netflix. Detajet për kohëzgjatjen dhe vlerën financiare të kontratës nuk janë bërë publike.
Lajmi vjen pak para transmetimit të sezonit të dytë të emisionit kulinar With Love, Meghan, që pritet të dalë në fund të këtij muaji. Sezoni i parë, ku Meghan gatuan me miq të famshëm, u pa nga 5.3 milionë përdorues, duke mos u renditur mes 300 programeve më të ndjekura të Netflix në gjysmën e parë të vitit 2025.
Projekti më i suksesshëm i çiftit me Netflix mbetet dokumentari Harry & Meghan, i publikuar në dhjetor 2022, me 23.4 milionë shikime.
Archewell ka paralajmëruar edhe një episod special festiv të With Love, Meghan, si dhe një dokumentar të ri të titulluar Masaka Kids, A Rhythm Within, për një jetimore në Ugandë që shërben si simbol shprese përballë pasojave të krizës HIV/AIDS.
Shefja e përmbajtjes në Netflix, Bela Bajaria, tha: “Harry dhe Meghan janë zëra me ndikim, historitë e të cilëve prekin audienca në mbarë botën. Suksesi i dokumentarit Harry & Meghan flet vetë për jehonën e punës së tyre.”
