Duke nisur nga 1 shtatori 2025, Bashkimi Europian dhe Zvicra do të ndalojnë shitjen dhe përdorimin e të gjitha produkteve kozmetike që përmbajnë TPO (Trimethylbenzoyl Diphenylphosphine Oxide), një përbërës i përdorur gjerësisht për tharjen e shpejtë të manikyrëve gjysmë-të-përhershëm nën llamba UV.
Vendimi u mor pasi TPO u klasifikua si substancë e rrezikshme për shëndetin riprodhues (CMR kategoria 1B), duke e renditur atë automatikisht në listën e ndalimeve të Rregullores Europiane të Kozmetikës. Që nga data e hyrjes në fuqi, asnjë produkt me këtë përbërës nuk do të mund të tregtohet apo përdoret më, edhe nëse është blerë më herët.
Autoritetet thonë se masa synon mbrojtjen e konsumatorëve. Megjithatë, shumë sallone bukurie paralajmërojnë për pasoja ekonomike, pasi pritet të humbin stoqe me vlerë mijëra euro dhe të përballen me një gamë më të kufizuar ngjyrash.
Prodhuesit tashmë kanë nisur ofrimin e alternativave pa TPO, ndërsa ekspertët këshillojnë profesionistët e fushës të kontrollojnë etiketat (INCI) dhe të kalojnë sa më shpejt te produktet e reja të përputhshme me ligjin.
