Në një konferencë për shtyp, Ermal Meta ka shpjeguar mesazhin pas këngës “Stella Stellina”, me të cilën garon në Sanremo Music Festival. Kënga, e dedikuar fëmijëve në Gaza, është ndërtuar në një formë të qëllimshme, thekson Meta.
“Muzika të tërheq edhe të kërcesh, por është teksti ai që të ndalon të mendosh për një çast”, u shpreh ai. Sipas artistit, problemi më i madh sot është heshtja – një heshtje e imponuar, ku fjalë si Gaza dhe Palestinë nuk thuhen, sikur të ishin blasfemi.
“Heshtja është problemi i madh i së tashmes. Kjo këngë mbart një paradoks, paradoksin në të cilin jetojmë sot. Nëse nuk e dëgjon tekstin, të vjen të kërcesh, por nuk është rastësi, është bërë enkas kështu; pastaj dëgjon tekstin dhe ajo që po dëgjon të ndalon për një çast. E dëgjon me vëmendje dhe ndalesh pak, pastaj e harron dhe rifillon të kërcesh. I ngjan ‘scrolling’-ut të realitetit tonë. Sot të rriturit bëjnë shumë më tepër zhurmë se fëmijët dhe kjo është shqetësuese. Mbi të gjitha është një heshtje që ia imponojmë vetes; disa gjëra nuk mund të thuhen, nuk mund të thuhet Gaza, nuk mund të thuhet Palestinë, sikur të ishte blasfemi. Fakti që nuk mund të thuhen është blasfemi; blasfemia nuk është kjo, blasfemi është fakti që ato fshihen”, tha Meta.
Në natën e dytë të festivalit, “Stella Stellina” u rendit në pesëshen më të mirë. Këngëtari legjendar Adriano Celentano i ka shprehur mbështetjen Metës, duke e vlerësuar këngën si fituese.
