Larry Ellison, drejtuesi ekzekutiv (CEO) i kompanisë Oracle, ka arritur për herë të parë titullin e personit më të pasur në botë, duke kaluar në krye të listës së pasurisë globale dhe duke lënë pas Elon Musk, kreun e Tesla-s. Sipas Indeksit të Miliarderëve të Bloomberg, pasuria neto e Ellison u rrit me plot 101 miliardë dollarë vetëm brenda një dite, duke arritur në shifrën marramendëse prej 393 miliardë dollarësh në total.
Kjo rritje e jashtëzakonshme e pasurisë së tij është nxitur nga performanca e jashtëzakonshme e aksioneve të Oracle, të cilat u rritën deri në 41% gjatë ditës së mërkurë, duke shënuar rekorde të reja intraday.
Ndërkohë, Elon Musk zbret në vendin e dytë të listës, me një pasuri të vlerësuar në 385 miliardë dollarë, sipas të dhënave më të fundit të Bloomberg.
Ky zhvillim shënon një moment historik në garën mes miliarderëve më të mëdhenj të botës, duke e bërë Ellison-in – i cili ka themeluar Oracle në vitin 1977 dhe e ka shndërruar në një nga kompanitë më të fuqishme të teknologjisë – liderin e ri të pasurisë globale.
