Dizajneri amerikan i modës, Willy Chavarria, ka kërkuar falje pas kritikave se një model këpucësh, të krijuara në bashkëpunim me Adidas Originals, ishte “përvetësuar” nga traditat e artizanëve indigjenë në Meksikë.
Modeli “Oaxaca Slip-On” ishte frymëzuar nga sandalet tradicionale prej lëkure të quajtura huaraches, të punuara prej shekujsh nga komunitetet indigjene. Presidentja e Meksikës, Claudia Sheinbaum, kritikoi publikisht kompaninë, duke theksuar se produkti ishte prodhuar në Kinë pa konsultim apo njohje të autorësisë për komunitetet që e kishin origjinuar dizajnin.
“Jam thellësisht i penduar që ky dizajn nuk u zhvillua në bashkëpunim të drejtpërdrejtë dhe domethënës me komunitetin e Oaxacës,” tha Chavarria në një deklaratë për BBC, duke shtuar se synimi ishte “të nderohej shpirti kulturor dhe artistik i Oaxacës”.
Adidas, në një deklaratë zyrtare, pranoi gabimin dhe premtoi dialog të respektueshëm me komunitetin Zapotec të Villa Hidalgo Yalálag, si dhe diskutime për “restitucion” për dëmin e shkaktuar. Kompania ka hequr imazhet promovuese nga rrjetet sociale.
Ministria e Kulturës në Meksikë konfirmoi se Adidas ka kërkuar takim me autoritetet për të “riparuar dëmin” dhe për të njohur pasurinë kulturore të komuniteteve indigjene.
Chavarria, i cili më parë ka mbajtur postin e nënkryetarit të lartë të dizajnit në Calvin Klein, tha se ky rast “ra poshtë standardeve të respektit dhe bashkëpunimit që Oaxaca dhe njerëzit e saj meritojnë”.
