BBC Culture ka përzgjedhur 12 nga filmat më të shumëpritur të muajit tetor, dhe lista përmban rikthime të mëdha, drama të fuqishme dhe surpriza të pazakonta. Ja cilët janë disa prej tyre:
“The Smashing Machine” – Dwayne Johnson në rolin më serioz të karrierës
I njohur për filmat aksion me buxhet të madh, Dwayne “The Rock” Johnson këtë herë vjen në një dramë biografike të errët, ku interpreton luftëtarin legjendar të arteve marciale Mark Kerr. Filmi trajton jo vetëm betejat në ring, por edhe luftën me varësinë dhe problemet mendore. Emily Blunt luan partneren e tij.
“Anemone” – Rikthimi i madh i Daniel Day-Lewis pas pensionimit
Pas 7 vitesh mungesë, fituesi i trefishtë i Oscar rikthehet në ekran nën regjinë e të birit, Ronan Day-Lewis. Filmi rrëfen jetën e një ish-ushtari të izoluar në fshat, derisa e shkuara i troket sërish në derë. Në kast marrin pjesë edheSean Bean dhe Samantha Morton.
“Roofman” – Historia e vërtetë dhe e çmendur e grabitësit të fast-food-eve
Channing Tatum luan Jeffrey Manchester, i njohur si “Roofman”, një ushtarak që grabiste restorante duke hyrë nga çatitë, më pas arratiset nga burgu dhe fshihet… në një dyqan lodrash. Një komedi dramatike me Kirsten Dunst.
“Tron: Ares” – Universi dixhital rikthehet pas 15 vitesh
Jared Leto protagonizon pjesën e tretë të sagës kult “Tron”, ku një qenie virtuale shfaqet në botën reale. Me tematika aktuale mbi inteligjencën artificiale.
“John Candy: I Like Me” – Dokumentari që i bën homazh gjigantit të komedisë
Me intervista nga Tom Hanks, Steve Martin, Bill Murray e të tjerë, dokumentari sjell portretin e ngrohtë të aktorit të ndjerë John Candy.
“After the Hunt” – Julia Roberts në garë për Oscar?
Në dramën e re të Luca Guadagnino, dy profesorë (Julia Roberts dhe Andrew Garfield) përballen me një akuzë të rëndë brenda universitetit, duke hapur tema si abuzimi, morali dhe pushteti.
Lista vazhdon me tituj si “Kiss of the Spider Woman”, “If I Had Legs I’d Kick You”, fituesin e Cannes “It Was Just an Accident”, “Bugonia” me Emma Stone, biografinë “Springsteen: Deliver Me from Nowhere” dhe adaptimin modern të “Hedda”.
