Lidhur me pallatin e “Arlis Ndërtim” të biznesmenit Armand Lilo, që u shkrumbua pak ditë më parë nga zjarri, në Tiranë u pyetën pesë fëmijë, të cilët nga këqyrja e kamerave të sigurisë shfaqen duke hedhur mbeturina në një karrocë që konsiderohet si vatra nga ku shpërthyen flakët.
Sipas prokurorisë, të miturit janë banorë të kompleksit dhe pyetja e tyre është kryer në prani të psikologëve dhe prindërve.
Ndërkohë, burimet bëjnë me dije se prokurori i çështjes ka urdhëruar policinë që të kryejë veprime të tjera në vendngjarje, si dhe pyetjen e disa shtetasve të tjerë.
Pas ngjarjes, policia arrestoi katër shtetasit Razie Sula, Agron Cara, Enver Ademi dhe Altin Furtuna. Ata dyshohen se kanë shkelur rregullat për mbrojtjen nga zjarri. Më pas, ata u liruan nën masën e detyrimit për paraqitje.
Prokuroria pret përfundimin e akt-ekspertizës për përcaktimin e shkaqeve të zjarrit, pasi pavarësisht pamjeve filmike për zjarrin në disa kuti të një marketi, vatra nuk është ende e qartë.
