Një vatër zjarri ka shpërthyer pasditen e së martës në fshatin Lekël të Tepelenës, duke përfshirë me flakë një sipërfaqe të madhe me pyje dhe toka të mbjella nga banorët e zonës.
Zjarri ka shkaktuar dëme të rënda, duke shkrumbuar edhe kishën ortodokse “Shën Ilia”, e cila është shpallur monument kulture i kategorisë II. Kjo kishë historike u ndërtua rreth viteve 1800 nga Thanas Vaja, ish-sekretari i Ali Pashë Tepelenës.
Sipas raportimeve paraprake, flakët kanë përfshirë gjithashtu disa banesa, tre stane dhe kanë shkaktuar humbjen e tre viçave. Situata është përkeqësuar edhe më tej, pasi dy bomba të mbetura nga Lufta e Dytë Botërore kanë shpërthyer si pasojë e temperaturave të larta dhe kontaktit me zjarrin.
Pamjet nga terreni tregojnë një situatë alarmante, ndërsa banorët i bëjnë thirrje autoriteteve për ndihmë të menjëhershme dhe shtimin e forcave zjarrfikëse në zonë.
