Një ekip i specializuar për kërkime nënujore i Forcës së Sigurisë së Kosovës ka mbërritur në Klos dhe, bashkë me forcat shqiptare, ka nisur kërkimet për gjetjen e trupit të 30-vjeçarit Jurgen Karaj, i cili dyshohet se është marrë nga rrjedha e një përroi në fshatin Dars.
Presidentja e Kosovës, Vjosa Osmani, si komandante e Përgjithshme e Forcave të Armatosura të Kosovës, ka autorizuar ekipin e specializuar për kryerjen e kërkimeve nënujore për të mbështetur forcat shqiptare.
Ekipi kosovar do të përdorë pajisje të specializuara, përfshirë skaner për ujëra EDGE TECH 5201 dhe dronin nënujor DEEP Trekker DTG 3 ROV.
Kërkimet për gjetjen e 30-vjeçarit në Klos vazhdojnë prej disa ditësh, ndërsa në operacion kanë marrë pjesë forca të shumta, përfshirë ushtrinë, Forcat “Shqiponja”, shërbimet zjarrfikëse të Matit dhe Klosit, punonjës të Bashkisë Klos, si dhe banorë të zonës dhe familjarë të të zhdukurit.
Më 10 janar, Jurgen Karaj po udhëtonte si pasagjer në një mjet tip “Audi” me targa angleze, që drejtohej nga miku i tij 24-vjeçar, Andi Losha, kur makina doli nga rruga dhe ra në përroin e fshatit Dars.
24-vjeçari dyshohet se pas aksidentit është larguar nga vendngjarja dhe nuk ka ndihmuar 30-vjeçarin të dalë nga mjeti. Losha u arrestua pasi dyshohet se ka drejtuar makinën në gjendje të dehur.
