Oficerët e Agjencisë Kombëtare Kundër Krimit në Britani (NCA) kanë zbuluar një fermë kanabisi në Dudley, pas një serie bastisjesh të realizuara sot. Gjatë operacionit, që përfshiu edhe aksione në disa prona të tjera në Birmingham, oficerët arrestuan 6 persona dhe zbuluan rreth 80 bimë kanabisi, të cilat kanë një vlerë të përafërt prej 80,000 paund.
Një shqiptar 34-vjeçar, një grua 29-vjeçare dhe një burrë 21-vjeçar u arrestuan për shkelje të ligjit të imigracionit dhe do të trajtohen nga Zyra e Imigracionit. Po ashtu, gjatë bastisjeve, oficerët zbuluan rreth 50,000 paund në para të gatshme dhe gjetën rreth 20 kilogramë kanabis bimor të fshehur në një papafingo.
Në kuadër të operacionit, oficerët bastisën gjithashtu një shtëpi në Warstone Lane, Birmingham, ku u gjetën rreth dy kilogramë kokainë. Dy burra të moshës 23 dhe 25 vjeç u arrestuan me dyshimin për posedim të drogës të klasit A me qëllim shpërndarjen.
Një tjetër kontrolle u realizua në Pumphouse Way, Birmingham, ku u gjet një sasi e madhe pajisjesh për kultivimin e kanabisit në një hambar kopshti.
Komandanti i Degës së NCA-së, Saju Sasikumar, deklaroi: “Krimi i organizuar dhe kultivimi i kanabisit janë shpesh të lidhura ngushtë me imigracionin ilegal, me individët që ndodhen në mënyrë të paligjshme në Mbretërinë e Bashkuar, të cilët shfrytëzohen për të punuar në këtë tregti ose detyrohen të paguajnë borxhin për udhëtimin e tyre.”
Ai theksoi se ky sekuestrim është një goditje e rëndësishme për grupet e krimit të organizuar, duke lënë një boshllëk financiar të konsiderueshëm për bandat që përfitojnë nga kjo veprimtari kriminale.
