Policia ka zbardhur dëshminë e Luan Maçit, autorit të dyshuar të grabitjes me armë të një pike këmbimi valutor brenda qendrës tregtare “Concord”, në zonën e “5 Majit”.
Fillimisht, 42-vjeçari ka mohuar akuzat para efektivëve, duke pretenduar se nuk kishte lidhje me grabitjen e rreth 300 mijë lekëve të reja. Megjithatë, gjatë kontrollit në banesën e tij, policia gjeti në lavatriçe rrobat që dyshohet se u përdorën gjatë grabitjes, si dhe briskun e rrojes, prova që çuan në pranimin e autorësisë nga ana e tij.
Në dëshminë e dhënë para hetuesve, Maçi ka treguar se e kishte planifikuar më herët grabitjen.
“Planifikoja grabitjen që më përpara, por pas tentativës për të grabitur bankën në zonën e ish-Parkut u frikësova dhe vendosa ta shtyja. Isha i detyruar, sepse kam shumë borxhe dhe një nënë të sëmurë në gjendje shumë të rëndë,” është shprehur ai.
Sipas burimeve pranë policisë, menjëherë pas grabitjes Maçi është larguar pa nxitim nga qendra tregtare. Fillimisht ka hyrë në këmbë brenda tregut të Medresesë dhe më pas ka dalë nga ana e pasme përmes rrugicave të zonës.
Armën e dyshuar, një pistoletë, ai e kishte fshehur fillimisht në një pusetë, ndërsa më pas kishte marrë një taksi dhe ishte kthyer në banesë. Për të fshehur identitetin, Maçi kishte hequr mjekrën dhe u kishte thënë efektivëve se kishin ngatërruar personin.
Gjatë kontrollit, policia i gjeti vetëm 15 mijë lekë të reja, ndërsa pjesa tjetër e shumës dyshohet se është përdorur për shlyerjen e borxheve. Sipas burimeve hetimore, dëshmia e tij përmban edhe disa kontradikta lidhur me përdorimin e parave të grabitura.
