Mark Nika, xhaxhai i Aleks Nikës që u vra në protestën e 21 Janarit 2011, ka folur për mediat pas takimit që pati këtë të martë me kreun e SPAK, Klodian Braho.
Ai tha se është e papranueshme që kanë kaluar 15 vite dhe ende nuk është mbyllur çështja në fjalë. Për më tepër, shtoi ai, që as personat që kanë dijeni, nuk janë thirrur të gjithë në Prokurorinë e Posaçme.
“Nuk ka asnjë person në akuzë. SPAK thotë po punojmë. Po presim tani ata e kanë në orë se si do të shkojë hetimi, ne kemi pretendimet tona. Vërejtja jonë është se hetimi duhet të jetë më shpejt, të gjithë personat që kanë dijeni nuk janë thirrur, duke filluar edhe përmes kryeministrisë në atë kohë, gardës. Është krim i rëndë, do e ndjekim në vazhdimësi derisa të zbulohet e vërteta. Ne kemi kërkuar psh ish sekretarin e këshillit të ministrave, punonjësit e serverëve të IT, nuk janë thirrur se di pse thonë se janë të panevojshme. Hetimi është i përciptë për mua, 15 vjet janë shumë. Ne do të marrim të gjitha masat që çështja të zbardhet.”, u shpreh ai.
Sa i përket kasetës së dorëzuar në SPAK, ai tha se ende nuk është dërguar për riinspektim.
“Kaseta është për riekspertim, akoma s’e kanë dërguar më duket. Kërkova unë që të takohem me zotin Braho. Nuk na zë vendi kur presim. Kjo çështje duhet të ishte përfunduar, është e papranueshme, sepse të gjithë shqiptarët pyesin se përse nuk shkojnë para gjyqit vrasësit. Aty dallohen vrasësit nga organizimi i protestës. Përgjegjës është shteti. Nuk e bën organizimin për të shkuar për t’u vrarë. “, shtoi ai.
Hetimet për 21 janarin u rinisën nga SPAK pasi më parë u dha rekomandimi nga ana e Gjykatës së Strasburgut. Prokuroria e Tiranës shpalli fillimisht moskompetencën për rifillimin e hetimeve dhe çështja i kaloi SPAK.
