Pasi rihapi procesin për Arben Frrokun, për shkak të detyrimeve që rridhnin nga një vendim i Gjykatës së Strasburgut, Gjykata Kushtetuese e rrëzoi kërkesën e tij dhe vulosi dënimin me burgim të përjetshëm për biznesmenin. Frroku është dënuar përjetësisht për vrasjen e kryekomisar Dritan Lamaj dhe aktualisht ndodhet në burg në Holandë.
Mbi bazën e ankimit të Frrokut, Kushtetuesja shfuqizoi vendimin e saj të vitit 2018, në zbatim të vendimit të Strasburgut dhe pasi shqyrtoi pretendimet e tij vendosi t’i rrëzojë ato, pasi nuk i gjeti të drejta.
Arben Frroku kishte kërkuar rihapje të procesit gjyqësor dhe shfuqizimin si antikushtetues të vendimeve nr. 73, datë 29.06.2015 të ish-Gjykatës së Apelit për Krime të Rënda, nr. 443, ditë 08.06.2017 të Kolegjit Penal të Gjykatës së Lartë. Ai kishte kërkuar edhe kthim të çështjes për rigjykim pranë gjykatës kompetente duke urdhëruar rigjykimin e saj me tjetër trup gjykues.
Biznesmeni Frroku pati një betejë të gjatë me drejtësinë dhe në krye të herës ai mori pafajësi nga Gjykata për Krime të Rënda. Apeli për Krime të Rënda e gjeti fajtor atë dhe dënoi me burg përjetë, por ndërkohë Frroku ishte arratisur nga vendi dhe u arrestua në Holandë.
Me këtë vendim të Kushtetueses dënimi përjetë vuloset për Frrokun. Ai akuzohet se vrau kryekomisar Dritan Lamaj në shkurt 2013.
