Detaje të reja janë zbardhur nga dëshmia e 40-vjeçarit shqiptar që vrau gruan në qytetin Volos të Greqisë, i cili u arrestua dhe u dërgua në paraburgim për vrasjen e gruas së tij 36-vjeçare,
Sot para gjykatës ka paraqitur një memo mbrojtëse me pretendime që prekin deri në fyerjen e kujtimit të viktimës.
Në deklaratën e tij ai ka mohuar akuzat për dhunë në familje, abuzim fizik apo detyrim për marrëdhënie seksuale pa dëshirën e saj, duke i cilësuar si të pavërteta dhe të pabazuara.
Në dëshminëne tij, 40 vjeçari pretendon se ishte provokuar rëndë emocionalisht, kur e ndjera i tha me ironi se fëmija që kishte humbur nuk ishte i tij, çka e ka futur, sipas tij, në një “gjendje amoku dhe errësirë mendore”.
Thotë se nuk kishte qëllim ta vriste, por se donte vetëm ta trembte, duke përdorur një thikë që, sipas tij, ishte në shtëpi për gatim.
Kërkon ekzaminim psikiatrik, duke theksuar se kohët e fundit kishte kaluar një periudhë të vështirë mendore, ishte shtruar me detyrim në një spital psikiatrik pas një tentative vetëvrasjeje dhe merrte trajtim mjekësor për çrregullim ankthi dhe konfuzioni.
Shpreh pendesë për veprën e kryer, kërkon falje nga fëmijët e tij dhe familjarët e viktimës, duke thënë se do të donte të ishte ai në vend të saj.
Megjithatë, sipas raportit të mjekësisë ligjore, gruaja kishte marrë disa goditje të rënda, përfshirë dy fatale — një në qafë dhe një në zemër — që nuk përputhen me idenë e "trembjes", por me një qëllim vdekjeprurës.
Gjykatësi dhe prokurori nuk u bindën nga argumentet dhe e dërguan të akuzuarin në burg, ndërsa hetimet do të vijojnë për zbardhjen e plotë të motivit dhe gjendjes mendore të autorit.
